15 solar e-jeep umarangkada na sa Nueva Vizcaya
BAYOMBONG, Nueva Vizcaya, Philippines — Nag-umpisa nang pumasada ang 10 sa 15 solar electronic jeep (e-jeep) sa Nueva Vizcaya matapos itong pormal na ilunsad ng First Novo Vizcayano Travelers Transport Cooperative (FNVTTC), Land Transportation and Franchise Regulatory Board (LTFRB) at lokal na pamahalaan ng lalawigang ito kamakalawa.
Ayon kay LTFRB regional director Edward Cabase sa Cagayan Valley, ang 23-passenger seat na kauna-unahan sa buong Region 2 ay dinisenyuhan ng Star 8 Green Technology kung saan mayroon itong libreng Wi-Fi, charging para sa mga gadgets, TV monitor, closed-circuit television camera at mga maliliit na electric fan para sa mga pasahero.
“This is part of the national government’s Public Utility Vehicle Modernization Program,” pahayag ni Cabase.
Ayon pa kay Cabase maging ang paraan ng pagbabayad ng mga pasahero ay sa pamamagitan na ng cards na maaaring malagyan ng load kung saan automatic na may mga diskuwento sa mga estudyante o senior citizens.
Ayon naman kay Mars Cabungcal, chairman ng FNVTTC, ang 15 e-jeep na may rutang Solano-Bayombong, ang pinaka-commercial at educational na mga bayan ng lalawigan, ay nagkaroon ng libreng sakay kahapon, Sabado at ngayong araw, Linggo bago ang pormal na paniningil ng P15 na pasahe sa mga pasahero sa Lunes, Feb. 10.
Samantala, bagama’t pabor sa modernisasyon si Solano Mayor Eufemia Dacayo, kailangan din umanong paghandaan ang maaaring epekto nito lalo na sa mga maliliit na tricycle drivers na posibleng mawalan ng kita lalo na at karamihan sa mga pasahero ng Solano-Bayombong ay sa tricycle sumasakay.
Umalma rin si Rep. Luisa “Banti” Cuaresma at inalala ang maliliit na operators dahil sa mataas na presyo ng isang e-jeep na nasa humigit kumulang sa P2.3 milyon ang bawat isa mula sa dating P1.3 milyon.
- Latest
