Pagtatayo ng Kaliwa Dam, hirit ng mga magsasaka
BUSTOS, Bulacan, Philippines — Isang resolusyon ang pinagtibay ng mga magsasaka ng palay sa Angat-Bustos-Pandi (Anbuspa) na humihiling kay Pangulong Rodrigo Duterte na agad nang pasimulan ang pagtatayo ng Kaliwa Dam.
Tugon ito ng mga magsasaka sa hiling ni Presidential Adviser on Peace Process Secretary Carlito Galvez at tumatayong Cabinet Officer for Regional Development and Security (CORDS) ng gitnang Luzon, na suportahan ang proyektong Kaliwa Dam sa idinaos na asembleya ng mga magsasaka ng Anbuspa na ginanap sa gilid ng Bustos Dam.
Ipinaliwanag ni Sec. Galvez na kung maitatayo ang Kaliwa Dam, mas lalaki ang alokasyong tubig para sa irigasyon ng mga magsasaka mula sa Angat Dam.
Positibo ang tugon dito ni Severino Santos, bagong chairman ng Anbuspa dahil aniya sa mahabang panahon hanggang sa kasalukuyan, 97% ng panga-ngailangan sa tubig ng Metro Manila ay nagmumula sa Angat Dam.
Pero kung maitatayo ang Kaliwa Dam, ani pa ni Santos, doon na kukuha ng suplay na 600 milyong litro kada araw ng tubig ang mga taga-Metro Manila. Ibig sabihin, 600 milyong litro rin ng tubig araw-araw ang maiiwan sa Angat Dam na magagamit nang husto hindi lamang bilang inuming tubig ng mga Bulakenyo, kundi para sa mga sakahan ng Bulacan.
Nagkakahalaga ang proyekto ng P12.2 bilyon kung saan P10.2 bilyon dito ay popondohan ng Official Development Assistance (ODA) mula sa China habang ang P2 bilyon ay magmumula sa Metropolitan Waterworks and Sewerage System (MWSS).
Sa Bustos Dam iniimbak ang mga sobrang tubig mula sa Angat Dam na nasa Norzagaray, Bulacan.
- Latest
