3 sundalo sugatan sa encounter
MANILA, Philippines — Tatlong sundalo ang nasugatan makaraang makasagupa ng tropa ng pamahalaan ang nasa 20 na rebeldeng New People’s Army (NPA) na nagresulta upang makubkob ang kampo ng komunistang grupo sa isang liblib na lugar sa Brgy. San Bueno, Sampaloc, Quezon kamakalawa.
Ayon kay Captain Patrick Jay Retumban, spokesperson ng 2nd Infantry Division (ID) ng Phl Army, dakong alas-11:30 ng tanghali nang makasagupa ng tropa ni 1st Infantry Battalion (IB)-PA Commanding Officer Lt. Col. Jonathan Manio ang mga rebeldeng NPA sa nasabing lugar.
Nauna rito, nakatanggap ng report ang tropa ni Manio hinggil sa presensya ng mga armadong rebelde na nangongotong ng pera at pagkain sa mga residente sa lugar kaya agad silang nagresponde. Papasok pa lamang ang mga sundalo sa lugar ay sinalubong na sila ng mga putok mula sa mga rebelde na nauwi sa 30 minutong bakbakan na ikinasugat ng tatlong sundalo na hindi pa pinangalanan. Mabilis na nagsitakas ang mga rebelde bitbit ang mga sugatang kasamahan.
Narekober sa lugar ang isang M16 rifle na kargado ng magazine at mga bala. Nakubkob din ng militar ang pinagkukutaan ng mga rebelde matapos na tugisin ang mga tumatakas na kalaban.
Nakuha sa kampo ng mga rebelde ang mga personal na kagamitan, mga armas pandigma at mga pagkain.
- Latest