Dalagang fresh grad, utas sa 22 saksak
MANILA, Philippines — Kalunus-lunos na kamatayan ang sinapit ng isang 20-anyos na dalaga na kaka-graduate lang kamakailan sa kursong Finacial Management sa kolehiyo matapos siyang walang awang tadtarin ng saksak ng dalawang ‘akyat-bahay’ naganap kamakawala ng madaling araw sa Brgy. Molino 3, Bacoor City, Cavite.
Nalagutan ng hininga habang ginagamot sa ospital sanhi ng 22 saksak na tinamo sa iba’t-ibang bahagi ng katawan ang biktimang si Shanmaine Pestaño, residente ng Aqua St. Camella North Springville, ng naturang lugar.
Boluntaryo namang sumuko sa mga otoridad ang isa sa mga suspek na kinilalang si Andrew T. Bagawasan, 23, matapos na makatunog na natunton na ng mga pulis ang kanyang pinagtataguan.
Batay sa ulat ng pulisya, dakong alas-4:15 ng madaling araw, habang mahimbing na natutulog ang dalaga kasama ang walong taong gulang niyang pamangkin nang pasukin ng mga suspek ang bahay na nagdaan sa sinirang bintana sa ikalawang palapag.
Naalimpungatan umano ang biktima sa mga kaluskos ng mga suspek at nang makita siya ng mga suspek ay dito na siya pinagtulungang pagsasaksakin na umabot sa mahigit dalawampung beses hanggang sa duguang bumulagta.
Agad namang tumakas ang mga suspek matapos ang krimen na tangay ang mga pera, alahas, cellphone at iba pang mahahalagang gamit.
Naisugod pa sa pagamutan ang biktima ngunit binawian din ng buhay habang siya’y ginagamot dahil sa dami ng saksak na kanyang tinamo.
Patuloy naman ang pagtugis ng mga otoridad sa kasama ni Bagawasan.
- Latest