Bus vs bike: 2 patay

LEGAZPI CITY, Albay, Philippines – Dalawa-katao ang namatay makaraang salpukin ng pampasaherong bus ang kanilang motorsiklo sa panulukan ng Karangahan Boulevard at B. Ariola Drive sa Tabaco City, Albay kahapon ng madaling araw. Kinilala ang mga biktima na sina Kagawad Leslie Ramos ng Barangay Salvacion; at Rocky Brusula Marbella ng Barangay San Lorenzo sa nabanggit na lungsod. Base sa police report na nakarating sa Camp Simeon Ola, magkaangkas sa motorsiklo ang dalawa nang mahagip ng RJB line pagsapit sa intersection kung saan tumilapon ng ilang metro ang mga biktima. Sumuko naman sa pulisya ang driver ng bus na si Fernando Laguilles ng Barangay Bonga, bayan ng Bacacay, Albay.