10 arestado sa drug den

PAMPANGA, Philippines – Kalaboso ang binagsakan ng 10 drug peddler makaraang arestuhin sa isinagawang drug bust operation ng  mga operatiba ng pulisya sa Mawaque resetlement sa Barangay Sapang Biabas sa Mabalacat City, Pampanga noong Miyerkules ng hapon. Nakatakdang kasuhan ang mga suspek na sina Edison Canlas, 34; Joseph Waje, 43; Jojo Galang, Erwin Abenario, Mark Solomon, Elmer Obenario, Onnel Suba, Jorey Cauguiran, Melody Solomon, at si Josephine Solomon na mga residente sa nasabing barangay. Sa police report na nakarating kay P/Chief Supt. Rudy Lacadin, PNP regional director, sa bisa ng search warrant na ipinalabas ni Judge Omar T. Viola ng Angeles City Regional Trial Court Branch 57, sinalakay ang dalawang bahay na drug den ng mga suspek. Nasamsam ang 25-gramo ng shabu at  mga drug pharapernalia.