Negosyanteng pulis, itinumba

TUGUEGARAO CITY, Cagayan, Philippines – Pinabulagta ang negosyanteng pulis matapos itong pagbabarilin ng mga di-kilalang la­laki sa loob ng kanyang sikat na resto bar sa Barangay Centro 2, bayan ng Lasam, Cagayan noong Sabado ng gabi.?

Sa police report na nakarating kay P/Chief Insp. Ramil Alipio, hepe ng Lasam PNP, kumakain ang biktimang si SPO1 Ronel Saturno sa kusina ng pag-aaring resto bar nang bulabugin siya ng mga putok dakong alas-7 ng gabi.?

Pinadadapa ni SPO1 Saturno ang kanyang mga customer nang pagbabarilin siya ng mga hindi kila­lang lalaki na nagpanggap na customer sa nasabing restaurant.

Ayon kay P/Senior Supt Andres Sinaon, Qurino PNP director, si SPO1 Saturno ay nakatalaga sa himpilan ng pulisya sa bayan ng Saguday at kasalukuyang nasa schooling.

Noong 2011 ay nabig­yan si SPO1 Saturno ng parangal ni Regional Police Director P/Chief Supt. Rodrigo de Gracia bilang isa sa 10 Outstanding Policeman sa Cagayan Valley.