Pusher bulagta sa shootout

NORTH COTABATO, Philippines – Kamatayan ang sumalubong sa sinasabing notoryus na drug pusher matapos itong makipagbarilan sa mga operatiba ng pulisya sa isinagawang operasyon sa Purok 4, Barangay Colon sa bayan ng Maasim, Sarangani kahapon. Ayon kay PO3 Dennis Danao ng Maasim PNP, sinalakay ng PNP ang pinagkukutaan ni Maximo Hunwel Omaya subalit pumalag ito at nakipagbarilan sa pangkat ng mga awtoridad kaya napatay. Sa bisa ng search warrant, naaresto naman ang kasabwat ni Omaya na si Aries Alibu Banaag. Narekober kay Omaya ang  cal.38 revolver na may limang bala, plastic sachet ng shabu, drug paraphernalia at mga bala naman kay Banaag. Sa pahayag naman ni PO3 Danao, mino-monitor na nila ang modus operandi ng grupo ni Omaya noong isang buwan subalit masyadong madulas.