14-anyos lunod sa beach resort

MANILA, Philippines - Nauwi sa trahedya ang pagsalubong sa Bagong Taon ng 14-anyos na estudyanteng bakasyunista matapos itong malunod sa beach resort sa bayan ng San Fabian, Pangasinan kamakalawa ng hapon. Kinilala ang biktima na si Ed Paul Cemitara ng Makati City na nagbakasyon lamang sa nabanggit na bayan kaugnay ng pagdiriwang ng Kapaskuhan at Bagong Taon. Bandang alas-3 ng hapon nang mawala ang biktima habang naliligo kasama ang pamilya nito sa beach resort sa Barangay Nibaliw West sa nasabing bayan. Agad namang humingi ng tulong ang utol na si Mary Lorlaine sa pulisya kaya inilatag ang search and rescue operation. Natagpuan naman ang biktima na lumulutang  sa dagat matapos ang ilang oras na paghahanap na bagama’t naisugod pa sa ospital ay idineklara na itong patay.