2 mangingisda nawawala sa dagat

TUGUEGARAO CITY, Philippines – Patuloy na pinaghahanap ngayon ng pulisya at Bantay Dagat ang dalawang mangingisdang napagawi sa kinatatakutang Pulong Diablo kung saan pinaniniwalaang lumubog ang kanilang bangka sa karagatan ng Pasipiko sa Dinapigue, Isabela kamakalawa.

Kinilala ni Sr. Insp. Jose Torrijo, hepe ng Pulisya ng Dinapigue, ang mga nawawala na sina Elmer Angara at Manuel Bactul na kapwa residente ng Brgy. Digumased, Dinapigue.

Ayon sa pulisya, naglayag upang mangisda ang mga biktima sa kabila ng malalaki at malalakas na alon sa karagatan dulot ng Amihan.

Noong nakaraang linggo, sa parehong Pulong Diablo rin natagpuan ang lumulu-tang na bangkay ng kanilang ka-barangay na si Benjie Agustin matapos ding sirain ng alon ang kanilang bangka. Dalawang kasamahan ng biktima ang nakaligtas at nasagip na palutang-lutang sa karagatang sakop ng kalapit bayan ng Palanan.