CABANATUAN CITY, Nueva Ecija, Philippines – Pinaniniwalaan na dahil sa labis na depresyon dahil sa tinataglay na sakit kaya nagpasya ang isang 53-anyos na mister na magpakamatay sa pamamagitan ng pagtalon mula sa ikatlong palapag ng Dr. Paulino J. Garcia Memorial Research and Medical Center (PJG) sa Barangay. Quezon District, dito, kamakalawa ng hapon.
Basag ang bungo at lasog ang katawan ni Jocil Lirazan, jeepney driver at residente ng Barangay. R.A. Padilla, bayan ng Carranglan.
Nabatid sa imbestigasyon ni PO3 Adrian Ramos, may hawak ng kaso, bandang alas-4:10 ng hapon nang biglang tumalon mula sa ikatlong palapag ng male surgical ward ang biktima at nahulog sa konkretong pavement ng ikalawang palapag at nakakabit pa umano sa braso ng biktima ang suwero nito.
Hindi naman nabanggit sa ulat kung ano ang iniindang sakit ng biktima upang magdesisyon itong magpakamatay.