MANILA, Philippines - Dahil sa patuloy na pamamayagpag ng illegal na operasyon ng minahan, sinibak na sa puwesto ang provincial PNP director ng Camarines Norte at dalawang iba pang opisyal ng pulisya.
Sa panayam sa PNP Press Corps, sinabi ni Interior and Local Government Secretary Jesse Robredo, ipinag-utos niya ang pagsibak kina P/Senior Supt. Joselito Esquivel Jr, provincial PNP director ng Camarines Norte; P/Supt. Lito Andaya, hepe ng provincial police intelligence division at P/Supt Godofredo Tul-o, deputy provincial director for operations.
Nabigo si Esquivel na ipatupad ang cease and desist order na inisyu ng Department of Environment and Natural Resources (DENR) laban sa operasyon ng mga illegal na minahan.
Samantala, sa kabila ng kautusan ng DENR ay naiisyuhan pa rin ng permit ang mga small scale na minahan sa lalawigan.
Inihayag pa ni Robredo na nakatanggap siya ng mga reklamo mula sa maliliit na magmimina na nago-operate si Andaya ng kartel na sangkot sa pagbebenta ng mga eksplosibo sa small scale miner na ipinagbabawal.
Nabatid pa na nag-protesta ang grupo ng minero upang harangin ang pagpapatalsik kay Esquivel kahapon ng umaga pero natuloy pa rin ang pagsibak kung saan pumalit si P/Senior Supt. Jose Capinpin.
Tiniyak naman ni Robredo na isasailalim sa masusing imbestigasyon ang mga akusasyon laban kay Esquivel at dalawa pang opisyal.