MANILA, Philippines - Naging mitsa ng pagkaputol ng dalawang binti ng 29-anyos na binata ang pagtulog nito sa tabi ng riles makaraang masagasaan ng tren sa Barangay Nueva sa bayan ng San Pedro, Laguna noong Lunes ng gabi.
Kinilala ng pulisya ang biktima na si Jomar Rarogal ng Magnolia Street, Pacita Complex 2, Barangay San Vicente sa bayang nabanggit.
Ang biktima ay naputulan ng dalawang binti matapos masagasaan ng tren bukod pa sa pagkasugat sa kaliwang teynga, dibdib at iba pang bahagi ng katawan kaya isinugod sa Divine Mercy Hospital bago inilipat sa Philippine General Hospital.
Lumilitaw na nakatuwaan ng biktima na mahiga sa tabi ng riles habang wala pa ang tren. Gayon pa man, ‘di sinasadyang naidlip ito bunga ng sobrang pagod sa trabaho at nagkataong biglang dumaan ang humahagibis na tren na biyaheng Ligao City, Albay kaya naganap ang trahedya.