MANILA, Philippines - Tatlong estudyante sa high school ang iniulat na napaslang makaraang ratratin ng mga armadong kalalakihan habang nangingisda sa liblib na ilog ng Barangay Molina sa bayan ng Parang, Maguindanao noong Martes ng hapon.
Kinilala ni Maguindanao PNP director P/Senior Supt. Marcelo Pintac ang mga biktima na sina Rico Divinagracia, 15; Jubert de la Cerna, 13; at si Jomar Mama, 13.
Base sa imbestigasyon ng pulisya, magkakasamang nangingisda ang tatlo nang lapitan at ratratin ng mga armadong kalalakihan.
Sa impormasyong nakalap ng pulisya mula sa pamilya ng mga biktima, lumilitaw na napagkamalan ang tatlo na nagmula sa angkan ng pamilyang kaaway ng mga suspek kaya isinagawa ang pamamaslang.