BAYOMBONG, Nueva Vizcaya ,Philippines – Isa katao ang nasawi habang tatlong iba pa ang malubhang nasugatan matapos na aksidenteng mahulog sa bangin ang sinasakyan ng mga itong van sa bayan ng Natonin, Mountain Province kamakalawa.
Ayon kay Captain Rhuderick Pari-agua, ng 77th Infantry Battalion na nakabase sa nasabing lugar, kinilala ang nasawi na si Rita Wansi habang ang mga malubhang nasugatan ay nakilala naman na sina Donald Galing; Ernesto Sakang, isang sundalo na si PFC Jonathan Lasam na pawang mga residente ng nasabing bayan.
Bandang alas- 5:10 ng hapon kamakalawa nang maganap ang aksidente sa Sitio Umanob-ob, Barangay Banawel matapos mawalan ng kontrol sa manibela ang driver ng Delica van na si Joel Latigo na naging sanhi upang tuluyang mahulog sa 20 metrong lalim na bangin ang nasabing sasakyan.
Agad naman isinugod sa pinakamalapit na pagamutan sa bayan ng Natonin ang mga biktima bago dinala sa Veterans Regional Hospital sa lalawigan ng Nueva Vizcaya.
Matatandaan na nitong Undas ay limang katao rin ang nasawi habang 37 iba pa ang nasugatan matapos mahulog ang isang truck na sinasakyan ng mga biktima sa 80 metrong lalim ng bangin sa nasabing lalawigan.