ZAMBALES , Philippines — Kamatayan ang sumalubong sa isang vice gubernatorial bet makaraang ratratin ng mga ’di-pa kilalang lalaki sa loob ng kanyang tahanan sa Brgy. Mabanglit sa bayan ng Cabangan, Zambales kamakalawa ng umaga.
Napuruhan sa mukha si Willie Viloria, 45, independent candidate dahil ang partidong Alpha Omega 9K Aklat ng Buhay na kanyang kinaaniban ay ibinasura ng Comelec.
Ayon sa hepe ng pulisya na si P/Insp. Jose Arca, umiinom ng kape ang biktima kasama ang asawa nitong si Cherie, at dalawang anak na lalaki sa loob ng kanilang tahanan nang pumasok ang dalawang armadong lalaki.
Narinig naman ni Cherie at ng dalawang anak ang pinag-uusapan ng tatlo kung saan ang isa ay nagtanong kung nasaan ang bag sabay na pinagbabaril sa mukha ang biktima.
Tinangay ng mga suspek ang shoulder bag ng biktima na sinasabing naglalaman ng P2 milyon. Randy V. Datu