KIDAPAWAN CITY, Philippines – Sumuko kahapon sa pulisya ang mag-utol na lalaki na sinasabing bumaril at nakapatay sa mag-asawa noong Lunes sa bisinidad ng Brgy. New Panay, Tulunan, North Cotabato.
Sumasailalim na sa imbestigasyon ang mga suspek na sina Rene at Sonny Saragoza kung saan ilang oras matapos mapatay ang mag-asawang Virgilio at Judith Biton.
Sa inisyal na report, sinasabing paghihiganti ang isa sa motibo ng pagpatay sa mag-asawang Briton.
Napag-alamang si Virgilio Biton ay sinasabing hired killer at itinuturong utak sa robbery/hold-up noong Linggo sa Brgy. Bagong Tapay, sa bayan ng M’lang, North Cotabato.
Isa sa mga biktima ng holdapan noong Linggo ay si Percy Sagaroza-Palmares na sinasabing utol nina Rene at Sonny Saragoza.
Noong gabi ng Lunes, nagpang-abot sa bahay ni Danilo “Ketching” Pedrosa sa Brgy. New Panay, ang mag-asawang Biton at mag-utol na Saragoza hanggang sa magkapalitan ng putok ng baril.
Nang mahawi ang usok, bumulagta ang mag-asawang Biton. Sugatan naman sa paa si Rene na isang miyembro ng Cafgu.
Agad na sumuko ang mag-utol na Saragoza sa pulisya ilang oras matapos mapatay ang mag-asawa. Malu Manar