Pulis binoga ng utol na parak

CAMP CRAME – Bagsak kalaboso ang isang bagitong pulis matapos nitong mabaril ang nakatatandang kapatid na isa ring parak matapos ang mainitang pagtatalo sa Brgy. Aguit-Itan Calbayog City, Samar kamakalawa.

Kasalukuyang nasa kritikal na kondisyon ang biktima na si PO2 Narciso Senario, nakatalaga sa Calbayog Police dahil sa tinamong tama ng bala sa kanang bahagi ng ulo.

Boluntaryo namang sumuko sa mga nagrespondeng tauhan ng Speical Weapon’s and Tactics (SWAT) ng Calbayog Police ang suspek na si PO1 Jose Jay Senario, miyembro ng San Jorge Municipal Police Station ng San Jorge, Samar.

Sa report ng Police Regional Office (PRO) 8, dakong alas-10:15 ng gabi habang nasa tahanan nila ang biktima at suspek nang magkainitan ang mga ito. Napikon ang suspek nang bulyawan siya ng kanyang kuya kaya nagpanting ang tenga nito at binaril nito ng kanyang Taurus cal. 45 pistol. (Joy Cantos)