Lalaki binoga sa ulo habang nagto-tong-its

BOMBON, Camarines Sur – Hindi sukat akalain ng isang 30- anyos na lalaki na iyon na ang huli niyang paglalaro ng tong-its matapos siyang barilin sa ulo ng hindi pa nakikilalang suspek sa bahay ng kanyang kaibigan sa Brgy. Siembre, kamakalawa ng gabi.

Ang nasawi ay nakilalang si Ben Amata, may-asawa, magsasaka, ng Brgy. Sibobo, Calabanga ng nasabing bayan na namatay noon din dahil sa dami ng tama ng bala sa ulo.

Batay sa ulat,dakong alas- 7 ng gabi ay naglalaro ng tong-its ang biktima sa bakuran ng bahay ng kanyang kaibigang si Ramon delos Santos.

Bigla na lamang sumulpot ang hindi pa kilalang suspek na armado ng kal. 45 at agad na pinaputukan sa ulo ang walang kamalay-malay na biktima.

Inaalam pa ng mga awtoridad kung sino ang suspek at kung ano ang motibo nito. (Ulat ni Ed Casulla)