‘Armed, dangerous’ tag ng NBI kay Bato, pinalagan

MANILA, Philippines — “Wala umanong sapat na batayan ang paglala­rawan sa kanya bilang “armed and dangerous” ng National Bureau of Investigation (NBI).

Ito ang iginiit ng kampo ni Senador Ronald “Bato” dela Rosa, kasunod nang pahayag ni NBI Director Melvin Matibag.

“With all due respect to Director Matibag and the NBI, this characterization is without factual basis and, we submit, does not contribute to an orderly and peaceful resolution of the legal issues at hand,” ani Atty. Israelito Torreon.

“Senator dela Rosa is a sitting Senator of the Republic of the Philippines who has, at all times, conducted himself peacefully and in a manner consistent with his dignity as a public servant and as a Filipino citizen,” dagdag pa niya.

Binanggit ng kampo na ang deployment ng mga armadong tauhan para ipatupad ang International Criminal Court (ICC) warrant of arrest laban sa senador ay patuloy na pinagdedebatehan sa mga korte.

Muli rin nilang iginiit ang pag-atras ng Pilipinas mula sa Rome Statute noong 2019 at ang kawalan ng anumang warrant mula sa lokal na hukuman.

Ipinabatid din ng kampo na noong Mayo 22 ay naghain sila ng Manifestation with Reservation to File a Motion for Reconsi­deration sa Korte Suprema, kaugnay ng mga bagong pangyayari matapos ang naunang pagbasura sa hiling na temporary restraining order.

Nanawagan ang kampo ng senador sa NBI at iba pang ahensiya ng pamahalaan na magpakita ng pag-iingat at hayaan ang Korte Suprema na magpasya alinsunod sa Konstitusyon at rule of law.