P7.3 bilyong halaga ng mga pekeng produkto nasamsam ng BOC

MANILA, Philippines — Tinatayang aabot sa P7.37 bilyong halaga ng mga infringed underwear, hardware items, at iba’t iba pang goods ang nadiskubre ng Customs Intelligence and Investigation Service-Manila International Container Port (CIIS-MICP) ng Bureau of Customs (BOC) sa sabayang operasyon kamakailan.

Ang operasyon sa Caloocan City at Bocaue, Bulacan ay nakakasakop sa lahat ng mga bodega at nagresulta sa pagkadiskubre sa P7,370,000,000 halaga ng mga infringed goods, household items, kitchenwares, hardware materials, toys, at appliances.

“While we understand that there is a brazen attempt to smuggle in such large amount of infringed goods and other items, we are also confident that we are doing the necessary actions needed to address these activities,” wika ni BOC Commissioner Bien Rubio.

Sinabi ni CIIS Director Verne Enciso na ang operasyon sa loob ng isang compound sa Caloocan City ay nagresulta sa pagkakadiskubre ng 3,500 bales ng infringed underwear at mga medyas na mga kilalang branded products na  tinatayang nagkakahalaga ng P4.3 bilyon at panibagong P70 milyon naman ang nagmula sa iba pang bodega.

Isa pang operasyon sa bodega sa Bocaue, Bulacan ang nagresulta rin sa pagkadiskubre sa iba’t ibang items na nagkakahalaga ng P3 bilyon.

Sinabi ni Intelligence Group Deputy Commissioner Juvymax Uy na ang mga bodega ay ipinadlak at sinelyuhan, habang nakabinbin ang imbentaryo ng mga goods na isasagawa ng nakatalagang Customs examiner at sasaksihan ng CIIS, ESS, at mga warehouse representatives.