COVID-19 sa Metro Manila, malapit na sa ‘peak’ – octa
MANILA, Philippines — Malapit nang umabot sa “peak” o pinakamataas na bilang ng mga bagong kaso ng COVID-19 sa Metro Manila habang pinangangambahang kakalat din ang impeksyon sa mga karatig-lalawigan, ayon sa OCTA Research Group.
Sinabi OCTA fellow Dr. Guido David na umakyat na sa 22.4% ang positivity rate sa NCR o MM nitong Huwebes mula sa 18.4% noong Disyembre 14.
Ang naturang pagtaas ay alinsunod sa prediksyon ni infectious diseases expert at Philippine College of Physicians President Dr. Rontgene Solante na nagsabi na inaasahan ang pagtaas pa ng mga kaso ngayong holiday season dahil sa kabi-kabilang mga pagtitipon na sinabayan ng pag-relaks ng gobyerno sa mga health at safety protocols.
Sa kabila nito, nananatili naman na mababa ang hospitalization at ICU rate sa rehiyon ngunit pinangangambahan ang posibleng pagpasok ng mas mapanganib na JN.1 subvariant na natukoy na sa mga kapitbahay na bansa sa Asya.
Sa COVID-19 bulletin ng Department of Health nitong Biyernes, nadagdagan ng 557 bagong kaso ang bansa para umakyat ang kabuuang bilang ng kaso sa 4,132,200.
Nangunguna ang NCR sa may pinakamaraming kaso sa nakalipas na dalawang linggo sa naitalagang 2,293 kaso, kasunod ang Quezon City na may 645 bagong kaso.
- Latest
