Operators, gobyerno magtutulungan sa pagbuo ng mga polisiya sa e-sabong
MANILA, Philippines — Para sa pagpapaunlad ng industriya sa Pilipinas ay isinusulong ng isang gaming technology executive ang pagtutulungan ng mga regulator at mga operator ng e-sabong.
Sinabi ni Jade Entertainment and Gaming Technologies, Inc. Chief Executive Officer Joe Pisano na nakahanda ang kanyang kompanya na makipag-ugnayan sa mga mambabatas para makatulong sa pagtugon sa panawagan ng publiko hinggil sa e-sabong.
Sinabi ni Pisano na ang e-sabong ay magandang mapagkukunan ng kita ng pamahalaan dahil mayroon itong buong ecosystem ng mga industriya na sumusuporta rito.
Kinabibilangan ito ng mga sektor sa ilalim ng breeders, feed makers, veterinary, at employment na nag-aambag sa kabuuang 35 percent corporate tax para sa pamahalaan. Sinabi ni dating Presidente Rodrigo Duterte noong Marso na ang industriya ng e-sabong ay nagkakaloob sa gobyerno ng P640 milyon na kita kada buwan at nakalikom ng kabuuang P2.03 bilyon sa unang kalahating taon.
Iginiit pa ni Pisano na ang e-sabong ay dapat na ituring na tulad ng ibang sport dahil may kapareho itong set of rules at mechanisms na ipinatutupad dahil isa na rin itong propesyon sa mahabang panahon.
Ayon naman kay Philippine Amusement and Gaming Corporation (PAGCOR) Chairman and Chief Executive Officer Andrea Domingo, ang e-sabong ang nagkakaloob ng 8 hanggang 10 porsyentong kita ng korporasyon na umakyat sa kabuuang P26.70 bilyon sa unang anim na buwan ng 2022.
- Latest