48% ng pamilyang Pinoy, itinuring na mahirap sila — SWS
MANILA, Philippines — Sa pinakabagong Social Weather Station (SWS) survey na inilabas nitong Martes ay mas maraming pamilyang Pilipino ang itinuturing ang kanilang sarili na mahirap sa mga huling buwan ng administrasyon ni dating Pangulong Rodrigo Duterte.
Batay sa resulta ng SWS, nabatid na mula sa dating 43% lamang noong Abril, umaabot na sa 48% noong Hunyo, ang bilang ng mga Pinoy na ikinukonsidera ang kanilang pamilya bilang mahirap.
Ayon sa SWS, ang estimated na bilang ng mga self-rated poor families ay nasa 10.9 milyon noong Abril 2022 at 12.2 milyon naman noong Hunyo 2022.
Sa nasabing national survey na isinagawa mula Hunyo 26 hanggang 29, 2022, nabatid na 48% ng mga respondents ang nagsabing ‘mahirap’ ang kanilang pamilya. Ito ay pagtaas mula sa dating 43% lamang sa survey na isinagawa noong Abril.
Samantala, nasa 31% naman ang nagsabing sila ay nasa ‘borderline poor’ o pagbaba mula sa dating 34%.
Nasa 21% naman ng mga respondents ang nagsabing sila ay ‘hindi mahirap’ o pagbaba mula sa dating 23%.
Ang naturang survey, na non-commissioned, ay isinagawa sa pamamagitan ng face-to-face interviews ng may 1,500 respondents sa buong bansa, kabilang ang 300 sa Metro Manila, 300 sa Visayas, 300 sa Mindanao, at 600 sa Balance Luzon.
Ang sampling error margins ay nasa ±2.5% para sa national percentages, tig- ±5.7% naman para sa Metro Manila, Visayas, at Mindanao, at ±4.0% para sa Balance Luzon. - Angie Dela Cruz
- Latest
