Hamon na debate ni Robredo, tinabla ni Marcos
MANILA, Philippines — Tinanggihan umano ni presidential aspirant Ferdinand “Bongbong” Marcos Jr., ang hamon na one-on-one debate ng katunggaling si Vice President Leni Robredo.
Ayon sa kampo ni Robredo na sinabi umano ng tagapagsalita ni Marcos na si Atty. Vic Rodriguez na kailanman ay hindi mangyayari ang debate na hinihingi ni Robredo at muling idinahilan na ayaw nito ng debate dahil mas gusto nila ng positibong pangangampanya.
Ikinasa ni Robredo ang hamon kay Marcos dahil siya na lang ang hindi humaharap sa taumbayan sa isang debate kasama ang iba pang kandidato.
Nais din ni Robredo na sagutin ni Marcos sa harap ng taumbayan ang mga kontrobersiyang pumapalibot sa kanya at sa kanyang pamilya tulad ng utang na P203 bilyon sa estate tax na hanggang ngayon ay ayaw nilang bayaran.
Inatasan ng Korte Suprema ang pamilya Marcos na magbayad ng P203 bilyon sa estate tax halos dalawampu’t limang taon na ang nakalipas. - Danilo Garcia
- Latest
