Negosyante inambus, patay sa Caloocan
MANILA, Philippines — Inambus at napatay ng riding-in-tandem ang isang negosyante sa Caloocan City, kamakalawa ng hapon.
Ayon sa pulisya, ang nasawi ay nakilalang si Glenn Cayao, ng Block 12, Lot 28, Kaularan Village, Brgy. 12 ng lungsod.
Nabatid sa ulat na nakarating sa tanggapan ni Caloocan City Police Chief P/Col. Samuel Mina Jr, dakong alas-12:30 ng hapon nang maganap ang insidente sa kahabaan ng 6th St., corner 7th Avenue, Brgy. 121 ng nabanggit na siyudad.
Base sa inisyal na imbestigasyon ng pulisya, sakay ang biktima ng kanyang Toyota Fortuner at habang binabagtas ang naturang lugar ay biglang dinikitan ng mga suspect na magkaangkas sa isang kulay itim na motorsiklo.
Agad umanong pinagbabaril ang biktima na nagtamo ng mga tama ng bala ng baril sa katawan.
Matapos masigurong patay na ang biktima ay mabilis na tumakas ang mga suspect patungo sa direksyon ng C3 Road.
Patuloy naman ang isinasagawang imbestigasyon ng pulisya ukol dito, gayundin ang pagtukoy sa mga suspect at motibo sa isinagawang pagpaslang.
- Latest