Arsenal ng DND sa Bataan sumabog: 2 patay
MANILA, Philippines — Dalawang katao ang nasawi habang sugatan ang dalawang iba pa sa naganap na pagsabog sa arsenal depot ng Department of National Defense (DND) sa Camp Gen. Antonio Luna, Brgy. Lamao, Limay, Bataan.
Kinilala ang mga nasawi na sina Ricardo Solomon, 40, ng Orion, Bataan; at Marvin Tatel, 38 ng Barangay Alangan, Limay, Bataan. Habang nasugatan naman sina Macreldo Rodriguez, 57 at Allan Wisco, 36, kapwa naninirahan sa Brgy. Lamao.
Sa imbestigasyon, alas-10:45 ng umaga kamakalawa sa Bldg. 27 ng DND Arsenal ay abala ang mga biktma sa paghawak ng mga chemical components na gamit sa paggawa ng primer na bala nang bigla itong sumabog.
Agad nasawi si Tatel habang nadala pa sa affirmary ng kampo si Solomon ngunit binawian din ng buhay bunsod ng tinamong pinsala sa katawan.
Nagtamo naman ng minor injuries ang dalawang iba pang kasama ng mga biktima na nasa gusali rin nang mangyari ang pagsabog.- Jojo Perez
- Latest
