3 milyong COVID-19 testing naisagawa ng PRC
MANILA, Philippines — Mahigit sa tatlong milyong COVID-19 testing ang naisagawa ng Philippine Red Cross (PRC) sa buong bansa.
Ayon kay PRC Chairman at CEO, Senador Richard Gordon, hanggang 9:00 AM kahapon ng umaga ay nakapagsagawa na sila ng kabuuang 3,010,432 swab at saliva RT-PCR tests nationwide.
Ito’y may tatlong buwan lamang matapos na maabot nila ang 2 million milestone noong February 2021.
Matatandaang unang itinayo ng PRC ang kanilang unang molecular laboratory para sa COVID-19 RT-PCR testing sa kanilang National Headquarters sa loob lamang ng 14-araw upang suportahan ang pagsusumikap ng pamahalaan na labanan ang virus.
Abril 14, 2020 nang pagkalooban ito ng akreditasyon ng Research Institute for Tropical Medicine (RITM), o isang buwan lamang matapos na ideklara ng World Health Organization (WHO) ang virus bilang isang global pandemic.
Sa kasalukuyan, ang PRC ay mayroon nang 13 molecular laboratories sa buong bansa nationwide. - Danilo Garcia
- Latest