3 Koreano na wanted sa online scam, timbog
MANILA, Philippines — Naaresto ng mga tauhan ng Bureau of Immigration (BI) ang tatlong puganteng South Korean na pawang mga itinuturing na most wanted at binansagang lider ng “big-time syndicate” sa kanilang bansa na nagpapatakbo ng online scam at nambiktima ng marami nilang kababayan sa isang operasyon sa Parañaque City at Nueva Ecija, kamakalawa.
Kinilala ni Immigration Commissioner Jaime Morente ang mga nadakip na sina Jung Myunghun, 38, lider ng sindikato; Kang Wesung, 36 at Yu Daewoong, 38.
Matagal na umanong pinaghahanap ang tatlong takas ng mga Korean authorities at ng Interpol at humingi ng tulong sa BI nang makatanggap ng impormasyon na sa Pilipinas nagtatago ang tatlo.
Umabot sa 2,600 kaso ang kinakaharap ng mga suspek at nasa 10 bilyong won o US$9 milyon ang natangay ng mga suspek sa kanilang mga biktima. Ang tatlo ay nakakulong sa CIDG Headquarters sa Camp Crame.
- Latest