91-anyos na lola patay sa sunog

MANILA, Philippines — Isang 91-anyos na lola ang nasawi matapos na makulong sa loob ng kaniyang kuwarto nang sumiklab ang isang sunog sa kaniyang bahay sa Las Piñas City kamakalawa.

Ang nasawi ay kinilalang si Julieta Malasig, nakatira sa Yakal Street Brgy. Talon 3, ng naturang lungsod. Masuwerteng nakaligtas sa sunog ang nag-iisa niyang kasama sa bahay na si Elpedia Bobadilla.

Sa ulat ng Bureau of Fire Protection (BFP), alas-2:11 ng Linggo ng madaling araw nang sumiklab ang apoy sa mismong kuwarto na inookupa ng nasawing si Malasig. Hindi na nakalabas ng kaniyang kuwarto ang matanda nang mabilis na lamunin ito ng apoy at kumalat sa ibang bahagi ng bahay at ganap na alas-3:23 na ng madaling araw nang ganap na maapula ang sunog.