Autopsy sa bangkay ni Dacera tapos na
Cellphone ng mga persons of interest sinuri ng NBI…
MANILA, Philippines — Inihayag kahapon ni Department of Justice (DOJ) Secretary Menardo Guevarra na natapos na ng National Bureau of Investigation (NBI) ang forensic examination sa ikalawang awtopsiya na ginawa ng kanilang forensic team sa labi ng nasawing flight attendant na si Christine Dacera.
“The NBI has completed its forensic examination of tissues obtained from the subject’s remains. It is currently coordinating with the Makati Medical Center on related issues,” wika ni Guevarra sa mga mamamahayag.
Matatandaan na tumulak ang NBI sa General Santos City upang magsagawa ng re-autopsy sa bangkay ni Dacera para sa hiwalay o parallel investigation na ginagawa ng ahensya.
Sa kanilang pagsusuri, sinabi ni NBI Deputy Director Atty. Ferdinand Lavin na may krimeng nangyari sa pagkamatay ni Dacera at may interesting leads at encouraging results.
Sinabi pa ng kalihim na kikilos naman ang NBI digital forensic team para suriin ang mga datos sa mobile phones ng mga persons-of-interest.
Una nang sinabi ng NBI na nakakuha sila ng may 100 ml. na urine samples sa labi ni Dacera kahit na naisailalim na ito sa unang awtopsiya. Kumuha rin ang NBI forensic team ng tissue samples ng labi ng dalaga.
Una na ring isinailalim sa ‘polygraph test’ ang mga persons-of-interest na ikukumpara sa mga ebidensyang nakalap habang ang ilan sa kanila ay sumailalim sa ‘drug tests’ na nagnegatibo naman.
Sa ngayon ay hindi pa nailalabas ng NBI ang resulta ng ginawang eksaminasyon sa labi ni Dacera.
- Latest
