5,000 biktima ni ‘Rolly’ tatanggap ng suweldo — DOLE
Tutulong sa paglilinis sa Catanduanes
MANILA, Philippines — Inihayag kahapon ni Labor Secretary Silvestre Bello III na kukuha sila ng nasa 5,000 indibiduwal na naapektuhan sa pananalasa ng bagyong Rolly sa lalawigan ng Catanduanes para maglinis sa kanilang lugar at sila ay tatanggap na minimum wage salary.
Ayon kay Bello, makatutulong ito sa mga mahihirap na naapektuhan ng bagyong Rolly sa ilalim ng “Emergency Employment Program” (EEP) ng Department of Labor and Employment (DOLE).
Sinabi ni Bello na ang mga iha-hire ng DOLE partikular ang mga nasalantang mahihirap tulad ng labandera, tricycle driver, sidewalk vendor, sari-sari store owner ay susuwelduhan para sa paglilinis at pagsasaayos ng Catanduanes, sa ilalim ng Tulong Panghanapbuhay sa Ating Disadvantaged/Displaced Workers (TUPAD) program.
Kailangan lamang aniya, na magsabi sila sa nakasasakop na barangay dahil ipatutupad naman ito ng DOLE sa pamamagitan ng local executives sa Catanduanes na bibigyan ng pondo para sa 15 araw na pasahod sa 5,000 indibiduwal na makakapasok sa programa.
Aniya, minimum pay ang sahod base sa region, ang matatanggap ng 5,000 workers. Ito’y bilang tugon nila kay Governor Joseph Cua sa hiling na tulong pinansiyal para sa pambayad sa mga maglilinis sa sinalantang lugar sa Catanduanes.
Bukod sa Catanduanes, dadalhin din ang TUPAD program sa lalawigan ng Albay, na grabe ring sinalanta ng Bagyong Rolly madaling araw ng Nobyembre 1.
- Latest