OFWs may naghihintay na 30K trabaho sa BPO
MANILA, Philippines — Inihayag ng Department of Labor and Employment (DOLE) na nasa 30,000 posisyon sa business process outsourcing (BPO) industry o call center ang naghihintay sa mga kuwalipikadong ‘overseas Filipino workers’ na mapababalik sa bansa dulot ng pandemya.
Sinabi ni Labor Asst. Secretary Dominique Tutay na nakatakda silang lumagda sa isang kasunduan sa Information Technology and Business Process Association of the Philippines (IBPAP) para sa paglalaan ng posisyon sa mga OFWs na makakapasa sa pamantayan.
Tutulong ang DOLE sa pag-asiste sa mga OFWs sa pagkonekta sa kanila sa mga BPO companies at mabigyan sila ng oportunidad na magkaroon ng trabaho sa sariling bansa.
Magbibigay rin ang kagawaran ng database sa mga umuuwing OFWs na interesado at kuwalipikado para sa mga posisyon.
Ang mga interesadong OFWs ay ire-refer muna sa Technical Education and Skills Development Authority (TESDA) para mahasa ang kanilang kakayahan at iba pang skills para umakma sa hinihingi ng trabaho sa BPO partikular na sa komunikasyon.
- Latest
