1-metrong distansya sa sasakyan mananatili

MANILA, Philippines — Matapos ang magkakaibang pananaw, tinuldukan na ni Pangulong Rodrigo Duterte ang mga diskusyon matapos siyang magdesisyon na panatilihin sa 1-metro ang agwat o distansya ng mga pasahero sa loob ng mga pampublikong sasakyan.

Ayon kay Presidential Spokesperson Roque, pinag-aralan ni Duterte ang rekomendasyon ng parehong panig na pabor sa 1-metrong social distancing at mapababa ito upang mas maraming makasakay na pasahero.

“Matapos pong pag-aralan ni Presidente ang rekomendasyon ng parehong panig na dapat manatili na one-meter ang social distancing sa pampublikong transportation at ’yung mga nagsasabi na pupwede naman itong pababain basta meron wearing of mask, face shield walang salitaan at walang kain at paggamit ng mga sanitizing dun sa mga pambublikong transportasyon, nagde­sisyon na po ang Presidente kahapon,” ani Roque.

Sinabi ni Roque na mananatili ang isang metrong distansiya at dapat pa ring magsuot ng face mask at face shield ang mga pasahero. Bawal din ang pagsasalita at pagkain ag kailangang i-sanitize ang mga pampublikong transportasyon bilang proteksyon laban sa hawaan sa COVID-19

Inihayag naman ni Transportation Sec. Arthur Tugade na susundin nila ang utos ng Pangulo.

Matatandaan na mula sa 1 metrong distansiya ay binawasan ito at ginawang 0.75 metro ng DOTr na inalmahan ng iba’t ibang sector at ma­ging si Interior Secretary Eduardo Año ang Local Government.- Angie dela Cruz