Maynila at Pasay isinailalim sa state of calamity
MANILA, Philippines — Isinailalim kahapon ang lungsod ng Maynila at Pasay sa “state of calamity” kasunod na lumalalang sitwasyon sa pagkalat ng coronavirus disease 2019 (COVID-19).
Sa Resolution No.75 na pirmado ni Manila Councilor Ernesto Isip Jr., ay naglalagay sa lungsod sa “state of calamity”.
Una nang inaprubahan ni Mayor Isko Moreno at ng Sanggunian ang ilang ordinansa na may kaugnayan sa pagkontrol sa COVID-19, kabilang dito ang Ordinance No. 8616 na nagtatakda sa curfew mula alas-8:00 ng gabi hanggang alas-5:00 ng madaling araw.
Pinirmahan din ni Pasay City Mayor Emi Calixto ang resolusyon ng konseho na isailalim sa “state of calamity” ang lungsod dahil sa naitalang 30 persons under monitoring, 9 na persons under investigation at pagkasawi ng 2 residente.
Sa ilalim ng state of calamity, maaari nang gamitin ng lokal na pamahalaan ang calamity fund, at maipagbawal ang pagtaas ng presyo ng mga pangunahing pangangailangan.
Paiiralin na rin ngayong araw ang 8:00 PM- 5:00 AM na curfew sa lungsod.
- Latest