Pulis, binoga pa ng karibal

Nobya tiklo na may kasiping

MANILA, Philippines — Isang pulis ang sugatan matapos na mabaril sa hita ng lalaking inabutan niyang katabi sa higaan ng kanyang nobya sa Tondo, Maynila, kahapon ng madaling araw.

Nasa ligtas nang kalagayan sa Gat Andres Bonifacio Memorial Medical Center (GABMMC) ang sugatang si P/Chief Master Sgt. Edgardo Balabay, nakatalaga sa Manila Police Diostrict-Station 7, sa J. Abad Santos Avenue, Tondo habang ang suspek sa pamamaril ay nakilalang si Geraldo Millares, driver, may live-in partner, at residente ng Rawis St., Tondo.

Naganap ang insidente sa Rawis St., Road 10, sakop ng Barangay 123, Tondo.

Sa impormasyon, ang biktima ay nagtungo sa bahay ng nobya, na sinasabing live-in partner nito subalit nasorpresa siya nang datnan ang huli na katabi sa pagtulog ang suspek na residente rin ng Rawis St. Sa pagkabigla at galit na naramdaman ay binunot ang baril at tinangkang paputukan si Millares subalit nagmintis ito at hindi na nakaputok pa ang pulis. Dahil nakakuha ng pagkakataon ang suspek ay naagaw niya ang baril at saka pinaputukan ang nasabing pulis bago tumakas.