Tuloy ang PUV modernization – DOTr
MANILA, Philippines — Tuluy-tuloy pa rin ang isinusulong ng pamunuan ng Department of Transportation (DOTr) na Public Utility Vehicle Modernization Program (PUVMP).
Ito ang sinabi ni DOTr Sec. Arthur Tugade, at hindi totoo ang naglabasang ulat na hindi na nila itutuloy ang planong phase out sa lahat ng 170,000 units ng PUVs, matapos ang isinagawang deliberasyon sa Senado kaugnay sa kanilang panukalang P147 bilyong budget.
Ayon kay Tugade, ang sinabi umano nila sa Senado kamakalawa ay ikinukonsidera nilang “hindi otomatikong i-phase out” ang mga public utility jeepney (PUJ) units ng mga operators na hindi pa nakakapag-modernize at pansamantala ay papayagan muna silang bumiyahe kung papasa sila sa Motor Vehicle Inspection System (MVIS).
Kung pumasa man umano ang mga ito sa MVIS, pagkakalooban sila ng Land Transportation Franchising & Regulatory Board (LTFRB) ng Provisional Authority (PA) na balido para sa isang taon lamang at kinakailangan pa rin nilang sumailalim sa road worthiness check sa pamamagitan ng MVIS kada taon.
- Latest