Malacañang kay Leni: Tumulong sa problema sa trapiko
MANILA, Philippines — Sa halip na maghamon ng commute challenge sa mga opisyal ng gobyerno ay hinamon kahapon ng Malacañang si Vice-President Leni Robredo at miyembro ng oposisyon na tumulong na lamang sa gobyerno na maghanap ng solusyon para mabigyan ng solusyon ang trapiko.
Ayon kay Presidential Spokesman Salvador Panelo, mas mabuting tumulong na lamang sa gobyerno si VP Leni at magsumite ng panukala upang malunasan ang problema sa trapiko kaysa punahin ang Duterte government.
“Tama na ‘yang kritisismo. Ang gawin niyo na lang, ‘yung mga mahilig maghamon eh magbigay kayo ng mga mungkahi kung papaano kayo makakatulong sa pamahalaan, mga magagandang proposal gaya ni VP Leni,” wika pa ni Panelo sa media briefing sa Malacañang.
Aniya, ang pagiging kritiko ng administrasyon ay hindi makakatulong upang mahanapan ng solusyon ang problema sa trapiko sa Metro Manila.
Magugunitang binatikos ni Robredo si Panelo dahil sa pagtanggi umano ng tagapagsalita ng Pangulo na amining mayroong transport crisis.
Inamin naman ni Panelo matapos tanggapin ang commute challenge sa kanya noong Biyernes na mayroong traffic crisis sa Metro Manila pero walang transport crisis.
- Latest
