Lolong rider tinumbok ng FX

MANILA, Philippines — Isang 75-anyos na si Rufino Labinay ang nasawi sa ospital matapos na masalpok habang nagmomotorsiklo ng isang Toyota FX sa Brgy. Ballang, Buguey, Cagayan ka­makalawa. 

Sa ulat, dakong ala-1:00 ng hapon ay minamaneho ng biktima ang kanyang motorsiklo at nang patawid na ito ay siya namang pagdating ng FX na minamaneho ng suspek na si Ruel Pascua, 41 at nasalpok ito.

Lumipad sa ere ang ma­tanda sa lakas nang pagkasalpok at una ang ulo bago bumagsak sa kalsada.

Isinugod ng mga su­maklolo si Labinay sa isang ospital sa Camalaniugan kung saan ito nalagutan ng hininga ha­bang ginagamot.