Pagpatay sa vice mayor, ‘wag pulitikahin - Sandra Cam
MANILA, Philippines — ‘Huwag n’yong isentro sa pulitika ang imbestigasyon sa pagpatay kay Batuan Masbate Vice Mayor Charlie Yuson, III’.
Ito ang apela ni Philippine Charity Sweepstake Office (PCSO) Director Sandra Cam sa Manila Police District (MPD) kasabay ng pahayag na mas makabubuti umano kung magpunta ang mga imbestigador sa Batuan para makilala ang pamilya Yuson at posibleng makakakuha sila ng lead sa lugar.
Sinabi ni Cam na base sa nakuha niyang impormasyon, marami umano sa Batuan ang nawalan ng trabaho dahil gustong makopo ng pamilya Yuson ang transportasyon kaya tinanggal ang habal-habal.
Nalaman na may apat na barko ng RoRo ang pamilya ng nasawi at may mga negosyo kaya dapat na mas laliman pa ng MPD ang imbestigasyon para matukoy ang nasa likod ng krimen.
Una nang sinabi ni MPD Director Vicente Danao Jr., na lahat ng anggulo sa pagpaslang kay Yuson ay iimbestigahan, bukod sa pulitika, iligal na droga, negosyo o kaya ay personal na galit.
Tiniyak naman ni Lalaine, misis ni Yuson na nakahanda siyang harapin ang kasong libelo na posiblebg isampa laban sa kanya.
Kamakalawa ay iprinisinta ng Manila Police ang apat na suspek sa pagpaslang kay Yuson na kinilalang sina Bradford Solis, 41; Juanito de Luna, 54; Junel Gomez, 38 at Rigor dela Cruz, 38.
Tiniyak ni Danao kay Lalaine, asawa ng biktima na 101% na ang mga iprinisintang suspek na siyang pumatay sa kanyang mister.
Hindi naman sinabi ni Danao kung ang mga naarestong suspek ay konektado kay PCSO Director Sandra Cam.
- Latest
