4 pulis-Las Piñas naaktuhang lumalaklak, sibak
MANILA, Philippines — Apat na pasaway na pulis ang agad na sinibak sa puwesto makaraang mahuli sa akto ng hepe ng PNP-Internal Affairs Service na umiinom ng alak habang nasa duty sa Las Piñas City, kahapon ng madaling araw.
Kinilala ang mga nahuling pulis na sina PCpl. Randy Danao, Patrolmans Samruss Inoc, Robemarla Abales at Alquinn Orgen, pawang mga nakatalaga sa Las Piñas City Police.
Nabatid na nagsasagawa ng ‘proactive surprise inspection’ ang National Capital Regional Police Office- Regional Internal Affairs Service sa pangunguna mismo ni PBGen Jerry Galvan dakong alas-2:00 ng hapon nang matiyempuhan ang isang police checkpoint sa isang gasolinahan sa may Alabang Zapote Road sa Brgy. Talon, ng naturang lungsod.
Dito nahuli sa akto ni Galvan ang apat na pulis na nasa kasarapan sa pagpapalitan ng tagay ng brandy dahilan para kumprontahin sila ng heneral.
Nang malaman ito ni Southern Police District Director, PBGen Nolasco Bathan, agad niyang ipinag-utos ang pag-relieve sa apat na pulis at ipatapon sa District Headquarters Support Unit kung saan nasa ‘floating status’ sila.
- Latest