Magkapatid na paslit nalunod sa dagat
MANILA, Philippines — Kapwa natagpuang patay at palutang-lutang sa karagatan ang magkapatid na paslit matapos na tangayin ng malalaking alon at nalunod sa kanilang paliligo sa dagat na sakop ng Brgy.Tambongon sa bayan ng Viga, Catanduanes kamakalawa.
Nakuha dakong alas-12:30 ng tanghali ang bangkay ni Mark Justin Orcilada, 9; at bandang alas-8:00 ng gabi naman natagpuan ang bangkay ng nakatatandang kapatid na si Ysha Jane Orcilada, 11, pawang residente ng Brgy.San Vicente.
Batay sa ulat, dakong alas-10:30 ng umaga ay nagpunta sa dagat ang pamilya ng magkapatid para maligo para sa kanilang “family outing.”
Gayunman, makalipas ang mahigit isang oras ay tumatakbong umahon at nagsumbong ang pinsang si Jomar na tinangay nang malakas na agos ang magkapatid.
Humingi nang saklolo ang mga magulang sa mga opisyal ng barangay na agad lumusong para hanapin ang magkapatid pero umabot ng ilang oras bago isa-isang natagpuang patay ang magkapatid.
- Latest
