‘Pusher’ dedo sa drug-bust
MANILA, Philippines — Isang ‘tulak’ ng iligal na droga ang nasawi nang ito umano ay nanlaban sa mga otoridad sa ikinasang buy-bust operation kamakalawa ng gabi sa Valenzuela City.
Ang nasawing suspek ay kinilalang si Ramon Caparas, alyas “Monching”, 50, binata, tubong Bauan, Batangas at nakatira sa Road 3 L. Marcelo Street, Brgy. Malanday, ng lungsod.
Sa ulat ng pulisya, bago naganap ang shootout, dakong alas-7:39 ng gabi sa tapat ng bahay ng biktima ay nagsagawa ng buy-bust operation ang pulisya laban sa suspek.
Nang makabili ang pulis na nagpanggap na buyer ay nakahalata ang suspek na alagad ng batas ang ka-deal kaya’t nagbunot ng baril at pinaputukan.
Nakaiwas naman ang pulis at gumanti ng putok maging ang mga nakaantabay na kasamahan at napatay ang suspek.
Narekober sa lugar ng krimen ang isang kalibre .38 na rebolber na baril na may tatlo pang live na bala, tatlong napaputok na cartridge, at isang slug, apat na cartridge ng iba pang baril, anim na plastic sachet ng pinatuyong marijuana, 10 plastic sachet ng shabu at P1,000 marked money.
- Latest