Cellphone, tablet, atbp bawal na sa Bilibid
MANILA, Philippines — Upang masawata ang talamak na pangungurakot sa loob ng New Bilibid Prison, mariing pinagbabawalan na rin ang mga opisyal at kawani ng Bureau of Corrections (BuCor) na magdala sa loob ng pasilidad ng mga personal communication devices tulad ng cellphones, tablets, pocket wi-fi at laptop.
Ito ay base sa derektiba ni BuCor director, retired General Ronaldo “Bato” dela Rosa.
Nakasaad sa pinalabas na memorandum ni Dela Rosa, na may impormayon siyang natanggap, na ilan aniyang kawani ng BuCor ay pinapayagan ipagamit sa ilang inmates ang kanilang personal electronic gadget kapalit ng pera.
Bilang hakbangin, ipinag-utos ni Dela Rosa na bawal na ring magdala ng mga electronic gadget ang mga opisyal at kawani ng BuCor kapag pumasok sila sa prison compound.
Binalaan ni Dela Rosa ang mga opisyal at kawani ng BuCor, na mananagot ang mga ito sa kanya kapag sila ay nahuli.
Bukod sa NBP, kabilang din sa inisyuhan ng memorandum ni Dela Rosa ay ang Correctional Institution for Women, Prison and Penal Farms sa Davao, Iwahig, San Ramon, Sablayan sa Leyte.
- Latest
