Kamara niratipikahan na ang National Id system

MANILA, Philippines — Inaasahang agad na ipadadala sa Malacañang para mapirmahan upang maging ganap nang batas ang Identification System Act o mas kilala bilang National ID system matapos ratipikahan na ng Kamara.

Ang Philippine Identification Act ay makakatulong umano para maging seamless ang delivery ng serbisyo sa publiko, mas magiging maayos ang administrative governance, makakabawas sa katiwalian at Bureaucratic red tape, makakatulong para masawata ang mga ilegal na transaksyon at mapapabilis pa ang proseso ng transaksyon sa mga ahensiya o sangay ng gobyerno.

Sa sandaling maging ganap na batas, agad na tatrabahuhin ng gobyerno na palitan ng iisang national ID na lamang ang ibat ibang identification card na hawak ngayon ng mga Filipino.

Nakapaloob sa national ID ang buong pangalan, kasarian, blood types, petsa at lugar ng kapanganakan, status , address at litrato.

Gayundin ang mobile number, email address, biometric data tulad ng full set ng fingerprints at iris scan.

Sa Philsys registry, maitatala rin ang mga impormasyong ito para sa data base ng gobyerno.

Ang bawat mamamayan kasama pati ang mga dayuhan dito na naninirahan ay kailangang magpa rehistro ng personal sa accredited registration centers.