3 Pasay City prosecutors sinuspinde ng DOJ
MANILA, Philippines — Sinuspinde ng 60 araw ni Justice Secretary Menardo Guevarra ang tatlong piskal ng Pasay City dahil umano sa pagkakasangkot nila sa jewelry smuggling isyu sa Ninoy Aquino International Airport (NAIA).
Una nang sinibak sa pwesto ng Malacañang si Justice Assistant Secretary Moslemen Macarambon Sr. dahil sa nasabing isyu.
Pinasususpinde ni Guevarra si Pasay City Prosecutors Office Officer-in-charge (OIC) Benjamin Lanto; inquest prosecutor Florencio Dela Cruz Jr., at associate prosecution Atty.Clementine Villanueva.
Itinalaga naman ni Guevarra bilang OIC ng Pasay City Prosecutors Office si deputy city prosecutor Dolores Pulgo-Rillera.
Batay sa inihaing formal complaint laban kina Lanto, Dela Cruz at Villanueva ay iimbestigahan ang mga ito ng DOJ Internal Affairs Unit kaugnay sa “prima facie case” dahil sa gross neglect of duty, gross incompetence at inefficiency.
Iimbestigahan ang tatlong prosecutors dahil sa kwestiyonableng pagpapalaya noong Mayo 6 sa tatlong suspek na sina NAIA Customs Operations Lomontod Macabando at ang mag-asawang Abraham at Bang-sa Mimbalawang.
Napag-alaman na ang mag-asawang Mimbalawang ay mga magulang ng daughter-in-law ni Macarambon na nag-iintervene sa kaso.
- Latest
