Bilyong pondo na hindi ginagamit bawasan para sa biktima ng bagyong Lando

MANILA, Philippines - Dapat bawasan ng gobyerno ang bilyon-bilyong pondo na hindi ginagamit  upang matulungan ang mga naging biktima ng bagyong Lando partikular ang mga taga Central Luzon na itinuturing na ‘food basket’ ng bansa.

Ito ang iginiit ni Senate President Pro-Tempore Ralph Recto dahil ito ang  tamang panahon upang mapakinabangan ito.

Ayon kay Recto, ang Calamity Fund ay may balance na P9.6 bilyon base na rin sa pinakahuling posting ng Department of Budget and Management (DBM).

Iginiit rin ni Recto sa mga tanggapan ng gobyerno na may kaugnayan sa pagpapalabas ng mga Calamity Fund na dapat bilisan ang pag apruba sa request.

Ang Calamity Fund ay isang lump sum sa budget na ginagamit para sa pagtulong at rehabilitasyon ng mga lugar na tinamaan ng mga man-made at natural calamities.