Reklamo sa NBI vs AlphaNetworld, dumarami
MANILA, Philippines – Patuloy na dumarami ang mga nagrereklamo kay National Bureau of Investigation (NBI) Anti-Fraud Division chief Atty. Dante Jacinto laban sa AlphaNetworld Corporation na ginagamit ang social media na Facebook para makakolekta ng pera kahit walang produkto.
Muling nagbabala si Jacinto sa mga biktima ng pyramiding scam ng AlphaNetworld na personal na magreklamo sa NBI matapos hindi sumipot ang opisyales ng kompanya na sina Julius Allan Nolasco, Josarah L. Nolasco at Arthur Macogay Jr. sa mga subpoena ng kawanihan.
Huling nagreklamo sa NBI sina Maria Criselda Estabillo Fernandez at Restie Q. Sanchez, kapwa ng Angeles City, Pampanga; Estrellita Lavarias ng San Miguel, Maynila; Manny Largo ng Mabalacat, Pampanga; Nenita Fernandez ng Lingayen; at Emmanuel Samera ng San Carlos City, kapwa sa Pangasinan.
Naunang nagreklamo sa NBI si Emmanuel Estrella na nilinaw na bawat pioneering share ng AlphaNetworld ay may halagang P12,800 at naengganyo siya dahil may alok na health products. Ngunit walang ibinigay na produkto sa kanya ang kompanya at hindi na niya mabawi ang kanyang pera dahil pinalagda siya sa waiver at quitclaim.
Nagreklamo rin si Jane Disierto na nagsabing pinagtawanan lamang nina Nolasco at Macogay ang NBI sa katwirang legal ang kanilang negosyo sa FB kahit walang produkto.
Ginagamit ni Nolasco at ng iba pa niyang kasabwat ang kanilang FB accounts upang makaengganyo ng mga mare-recruit sa pyramiding scam na pinagpapasok ng pera sa kanilang bank accounts kapalit ng pangakong doble-dobleng tubo.
- Latest