4 Koreano tiklo sa pot session

MANILA, Philippines - Arestado ng pulisya ang apat na Koreano makaraang maaktuhang humihitit ng marijuana sa Angeles City, Pampanga kamakalawa.

Kinilala ni Sr. Supt. Eden Ugale, director ng Angeles City Police ang mga nasakote na sina Kim In Soo, Chin Woo Seong, Kim Mean Seong at Jeong Jin Bai; pawang nakatira sa Timog Park , Brgy. Cutcut ng lungsod.

Bandang alas-11 ng umaga nang masakote ang nasabing mga Koreano  na naaktuhang humihitit ng marijuana sa loob ng Echo Bar sa kahabaan ng Don Juico Avenue ng naturang siyudad.

Nasamsam sa pag-iingat ng nasabing mga Koreano ang 14 sticks ng marijuana  na isinailalim na sa laboratory analysis ng Angeles City Police Crime Laboratory.

Iginiit naman ng mga suspek na halamang gamot umano ang kanilang hinihitit na sinabi pang pinahihintulutan sa South Korea. Kasalukuyan na ngayong humihimas ng rehas na bakal ang mga suspek na nahaharap sa kasong kriminal.