Gunman ni mayor Domingo arestado

MANILA, Philippines - Arestado na sa mga ta­uhan ng Quezon City police ang itinuturong  gun­man o bumaril at naka­patay kay Maconacon  Ma­yor Erlinda Domingo.

Kinilala ang naarestong gunman na si Mar­sibal Abduhadi alyas Bagwis, na hinuli sa loob ng Salam Mosque sa  lungsod ganap na alas-12:30 ng madaling araw kahapon.

Sinalakay ang nasabing Mosque ng mga tauhan ng Criminal Investigation and Detection Unit (CIDU) at Special Wea­pons and Tactics (SWAT) na pinamunuan mismo ni QCPD Dir. Richard  Albano makaraang matanggap ng impormasyon na nagtatago sa lugar si Bagwis.

Ayon kay Dir. Albano, agad na napaligiran ng  mga awtoridad si Bagwis at hindi na nito nagawang  makabunot ng baril nang  tangkain pumalag sa mga  awtoridad.

Nakumpiska kay  Bagwis  ang  2  granada,  isang 9mm, 2  sachet ng  shabu, 2 sachet ng cocaine at  mga paraphernalias.

Giit ni Albano na close book na ang kaso ng pag­paslang kay Mayor Domingo dahil sa pagkakahu­li kay Bagwis. Pinapurihan naman ni  PNP Chief  Dir. Gen. Allan Purisima ang pamunuan ng QCPD dahil sa mabi­lis na paglutas sa kaso ng pagpatay kay Mayor Do­mingo.